Арстанбапта үрөндүк картошка өндүрүү боюнча талаа күнү өткөрүлдү
2026-жылдын 14-июлунда Базар-Коргон районунун Арстанбап айылында «Кошумча нарк чынжырчаларын агро каржылоо» долбоорунун алкагында үрөндүк картошка өндүрүү менен алектенген Арстанбап жана Жай-Терек топторунун фермерлери үчүн Талаа күнү өткөрүлдү.
Иш-чаранын негизги максаты Арстанбап аймагынын топурак-климаттык шарттарына ылайык картошканын жаңы сортторун көрсөтүү жана алардын өзгөчөлүктөрүнө салыштырмалуу баа берүү болду. Талаа күнүнө жалпы 34 адам катышты. Алардын арасында фермерлер, Базар-Коргон райондук агрардык өнүктүрүү башкармалыгынын адистери, Арстанбап-Ата айыл өкмөтүнүн өкүлдөрү, ошондой эле үрөндүк картошка өндүрүүгө кызыкдар болгон Аксы районунун фермерлери болду.
Талаа күнүнүн жүрүшүндө катышуучуларга Парадизо, Ривьера жана Силвана сортторунун өсүп-өнүгүү өзгөчөлүктөрү, Арстанбап аймагынын шарттарына ыңгайлашуусу, негизги ооруларга жана зыянкечтерге туруктуулугу тууралуу маалымат берилди.
Демонстрациялык тилкелерди кароо жана өсүмдүктөрдүн абалына визуалдык баа берүү учурунда Парадизо сорту ооруларга эң жогорку туруктуулукту көрсөткөнү белгиленди. Силвана сорту да жакшы туруктуулук көрсөтсө, Ривьера сортунун ооруларга туруктуулугу бул аймактын шарттарында салыштырмалуу төмөн болду.
Мындан тышкары, фермерлер өсүмдүктөрдү коргоо, азыктандыруу системасы, оорулар менен зыянкечтердин алдын алуу жана үрөндүк картошка өндүрүүнүн заманбап агротехнологиялары боюнча практикалык кеңештерди алышты. Тренер-консультанттар фермерлердин суроолоруна жооп берип, эгиндерди багуу, өсүмдүктөрдү коргоо каражаттарын колдонуу жана негизги технологиялык талаптарды сактоо боюнча сунуштарды беришти.
Талаа күнүнүн экинчи бөлүгүндө катышуучулар Арстанбап айылында GIZ долбоорунун алкагында реконструкцияланган, сыйымдуулугу 300 тонналык стандарттуу картошка сактоочу кампага барышты.
Катышуучулар кампанынын түзүлүшү, картошканы сактоого даярдоо талаптары жана үрөндүк картошканы сактоо үчүн оптималдуу шарттар менен таанышты. Ошондой эле температура жана нымдуулук режимин сактоо, желдетүү, түймөктөрдү туура даярдоо, жоготуулардын алдын алуу жана кийинки сезонго чейин үрөндүк картошканын сапатын сактоо маселелери талкууланды.
Талаа күнү фермерлер менен адистердин ортосунда тажрыйба жана практикалык билим алмашуу үчүн маанилүү аянтча болуп берди. Катышуучулар алынган маалыматтын практикалык маанисин белгилеп, сунушталган сортторду жана заманбап технологияларды өз чарбаларында колдонууга кызыкдар экенин билдиришти.
Иш-чара фермерлердин кесиптик билимдерин жогорулатууга, үрөндүк картошканы өндүрүү жана сактоонун заманбап технологияларын жайылтууга, ошондой эле фермерлер, адистер жана жергиликтүү өз алдынча башкаруу органдарынын ортосундагы кызматташтыкты бекемдөөгө өбөлгө түздү.
Талаа күнү аяктагандан кийин катышуучулар үчүн чай уюштурулуп, анда фермерлер тажрыйба алмашууну улантып, көрсөтүлгөн картошка сортторунун өзгөчөлүктөрүн, долбоордун иш-чараларын, мындан аркы кызматташтыкты жана аймакта үрөндүк картошка өндүрүшүн өнүктүрүүнүн келечегин